كأي يومٍ عادي، استقلّت 3 فتيات؛ جنة وسلمى وآية، مترو الأنفاق في طريقهنّ إلى المنزل، كانت الأمور تسير بشكل طبيعي حتى هاجمت سيدة في المترو فتاة من الثلاثة، وقالت: «لمي أكتافك دي الرجالة طالعة ونازلة، ده أنتوا بمناظركم دي تتمسكوا دعارة».
بالصدفة، سجلّت إحدى الفتيات الفيديو، وانتشر على مواقع التواصل الاجتماعي، بعنوان «هجوم سيدة المترو على إحدى الفتيات بسبب ملابسها».
و تواصلنا مع جنة، 24 سنة، طالبة بجامعة حلوان، إذ روت تفاصيل فيديو «سيدة المترو»، وقالت: «اليوم ده، إحنا كنا بنفطر في الكلية وراجعين، الست كانت قاعدة وفجأة قالت لصاحبتي (انتي فاجرة، انتوا بمناظركم دي تتمسكوا دعارة). لما لقيتها بتتكلم بالطريقة دي، رديت عليها (بتتكلمي كده ليه؟)، قلعت الشبشب وبدأت كانت عاوزه تضربنا بيه».
أضافت «جنة»: «صاحبتي كانت لابسة تي شيرت نص كم، وردّت بكل أدب (لو حد بص هو اللي هياخد الذنب مش أنا)، لبسي مفيهوش حاجة»، فجاء ردّ السيدة بحدة: «انتي فاجرة، انتوا بمناظركم دي تتمسكوا دعارة».
أكدت «جنة»، التي قامت بتصوير الفيديو، أن جميع السيدات والفتيات المتواجدات في المترو تضامنّ معهنّ، وتعالت أصواتهنّ: «همّ أحرار.. مالكيش دعوة».
استمرت المشاجرة بين السيدة والفتيات لعدة محطات، إلى أن انتهت الرحلة، وعادت كل منهن وفي قلبها «غصّة» مما حدث، كما تقول «جنة»: «أنا صورت الفيديو لكن مكنتش متخيلة إن ردود الفعل هاتكون كده، حد كلمنا من النيابة العامة والمسؤولين».
ورغم ردود الفعل الإيجابية إلا أنّ بعض رواد المواقع التواصل الاجتماعي هاجموا «جنة» وصديقاتها، كما تحكي: «الناس اللي في العربية كانت في صفنا، لبسنا كان عادي جدًا، واعتذرولنا، لكن بعض الناس على السوشيال ميديا فضلوا يدافعوا عن الست وشهّروا بينا، وبدأوا يتداولوا صورنا الشخصية، طيب بتدافعوا ليه وبناء على إيه؟».
