لو لسه مش عارف اللي بيحصل في كوكبنا… أنا هافهمك بالبلدي 16-1-2022 مع المصري افندي
و لو انت مش عايش معانا ف الكوكب…
ولو انتي مش عايشة معانا ف الكوكب….
فخليني اقولكوا ….
ومطولش عليكوا و قولولي طول…..
♦️ إنجلترا….
ف إنجلترا الدنيا مقلوبة على إسم النبي حارصة وصاينة رئيس الوزراء جونسون قال إيه يا خويا ساب الناس محبوسة سنة وحظر وقيود صارمة وحرمان بسبب الكورونا وهو داير على حل شعره واتسربت ليه صور ف حفلات جماعية بدون اي اجراءات احترازية….
والشعب الإنجليزي هناك قالب الدنيا لدرجة انه طلع وقدام إعتذار رسمي للشعب وقدم كمان إعتذار للحاجة اليزابيث ملكة انجلترا علشان يا قلب أمها وهي بتاخد العزا ف الراجل جوزها فليب هو كان عاملة حفلة عشاء وسكر وعربدة واتسربت الصور برضوا ليه…..
الشعب الإنجليزي بيطالب جونسون إنه يبقا زي الشعب المصري ….. آه والله قالوله كدا
قالوله شوف الحكومة المصرية بتعمل إيه وإعمل زيها بس خلينا على راحتنا زي شعب مصر
شوفوا …
هفضل أقول ان أكتر دولة بتكره مصر هي إنجلترا رغم إنها اكبر دولة ليها إستثمارات ف مصر…
وع الناحية التانية من الكوكب….
♦️روسيا….
كييڤ بتتهم روسيا إنها بتجهز مجموعات تخريبية وبتنشرها ف أوكرانيا علشان تعمل ثورة وهووب دبل كيك روسيا تقولك في عدم إستقرار ف اوكرانيا وعايزين نأمن حدودنا وتروح داخله بجيشها…. زي ما عملوا مع أذربيچان….
مش كدا وبس….
دا قرصنة روس هبأوا على كل المواقع الحكومية وقرصنوها وكتبوا رسالة تحذير وسموا نفسهم العلم المزيف..
روسيا مش هتسكت غير لما تضم أوكرانيا ليها… قولا واحدا
وع الناحية التانية من الكوكب….
♦️كوريا الشمالية ….
كيم جوانج أون حبيب ألبي وشبح الكوكب والكواكب المجاورة رئيس كوريا الشمالية أعلن عن نجاح تالت تجربة إطلاق صواريخ بالستية من قطار وهو ماشي….
انتوا متخيلين الرعب….
يعني خط قطر زي اللي بين القاهرة وأسوان دا يعتبر قاعدة اطلاق صواريخ متحركة وبيطلق صواريخ عابرة لللقارات ف اي وقت وف اي مكان وهو بيتحرك وبدقة عالية جدا….
وع الناحية التانية من الكوكب…..
♦️اليمن….
مجلس الامن بيدعوا الحوثيين على الإفراج عن السفينة روابي ….
آه والله إسمها كدا مش ألش مني
معلش مجلس الامن عايز يعمل تقلية ومزنوق ف بصلتين ومعلقة سمنة
وع الناحية التانية من الكوكب….
♦️كوكب تحيا مصر….
وف كوكب تحيا مصر العالم كله مقلوب علشان مصر قبضت على …. المحروس من العين اللي إسمه حسام المنوفي…
اللي هو مؤسس حركه حسم الاخوانيه …
قال إيه ياخويا بقى معارض سياسي !!
والحكومة المصرية بتقبض على المعارضين يا عيني وهما هربانين من الخرطوم ورايحين تركيا
طيب علشان الشعب المصري طيب وبينسى !!
حركه حسم دي احد الاذرع المسلحه لجماعة الاخوان وأكتر فرع دموي فيها وهي اللي كانت متكلفه بعمليات اغتيالات ضباط الشرطه والجيش
وهي الحركه المسؤوله عن محاوله اغتيال الشيخ علي جمعه ومحاوله اغتيال النائب العام
بس اهم واسوء عملية عملتها كانت تفجير محيط معهد الاورام لو تفتكروا ساعتها مات فيها ٢٠ شخص ومئات الجرحى
البرنس ده بقا إسمه … حسام المنوفي … هو مؤسس الحركه دي
البرنس كان هربان ف السودان ….
و مسافر يكمل عند الخليفه ف تركيا … قوووم إيييه الطياره اتعطلت في مطار الاقصر وعملت هبوط اضطراري واتقفش هناك.
كفاية كدا …..وتقعدوا بالعافية بقا ..🤍
» كل اللي كسر كوباية ف مصر هيتحاسب عليها «
عبدالفتاح السيسي ٢٠١٦
والسلام عليكم ورحمة الله وبركاته
تحيا مصر
تحيا مصر
تحيا مصر
بقلم: محمد نظيم
